Ang akong isaysay karon mahitungod kini sa usa ka lilas diin muponting kini sa atong inadlaw nga pagpakigbugno sa kalibutan ang ulohan niini mao ang “Eat, Love and Pray.”
Maaghup ba o mabublay ang pagkaon, pag-ampo ug pagmahal?
Matud pa sa panultihon nga “magpuyo sa kinabuhing hingpit sa katagbaw” o kun sa iningles pa Live Life to the fullest – ang maanindot palandungon samtang buhi pa kita niining kalibutana.
Apan kining maong panultihon daghan og hubad ug kahulogan. Naa ra kanato kun unsaon nato pagsubay kini aron makuha nato ang kinabuhing madagayaon.
Usa ka maanindot nga kahaponon sa adlaw nga Domingo diin ako ug ang akong kapikas sa kinabuhi milantaw og usa ka salida o lilas sa usa sa inilang tindahan sa dakbayan sa Tagbilaran.
Kining maong lilas nga nag-ulohan og Eat Pray Love, usa ka sugilanon sa usa ka magsusulat nga babaye nga ginganlan og Elizabeth Gilbert nga gidala ni Julia Roberts. Mihimo siya og usa ka pagbiyahi sulod sa usa ka tuig diin ang salapi nga iyang gigamit, usa ka advance payment sa usa ka publisher aron sa panghinaot nga kining maong lakaw ni Elizabeth, mobunga sa usa ka maanindot nga sugilanon pinaagi sa nobela. Ang mga nasud nga iyang giadto mao ang Italy, India ug Indonesia.
Apan si Liz, sama kanato nagpangita sa iyang “balance o pagpanimbang” – nga wala pa niya makita ug masinati sa iyang kinabuhi.
Gisulat kini nila ni Ryan Murphy (usa ka Amerikanong magsusulat, film ug TV Director ug producer alang sa salida ug TV nga diin ang inila niyang minugna mao ang Nip/Tuck ug Glee); Jennifer Salt (American actress, producer, ug screenwriter) ug Elizabeth Gilbert (American novelist, essayist, short story writer, biographer, and memoirist ug writer sa Novel nga Eat Pray Love).
Ug sikat usab ang mga producers niini nga mao sila si Brad Pitt, Dede Gardner, Jeremy Kleiner, Julia Roberts, Stan Wlodkowski, Tabrez Noorani ug si Ryan Murphy ang Director.
Eat!
Gipakita sa maong salida nga tungod sa kadagha’g buhat o busy sa tawo, wala na niya matagamtami kon unsa kalamian ang mga pagkaon. Wala na mabatyagi kon nakaon ba niya ang iyang gusto o wala.
Gihulagway usab nga adunay lamiang pagkaon nga gibutang sa talad – apan sa kahadlok nga motambok ug mawad-an sa hinigugma – iyang gihikawan ang iyang kaugalingon. Tungod sa pagpangita sa iyang pagpanimbang – iyang gibusog ang iyang kaugalingon. Apan gipakita nga bisan unsa ka pa ka busog ug katagbaw – kun wala pa nimo makita ang imong gitinguha ug wala pa nimo masinati ang kalipay’ng hilabihan – wala gihapon kini’y hinungdan.
Niini ang katagbawan anaa ra gayod sa atong kaugalingon kun giunsa nato kini pagsinati.
Pray!
Dili mahimong matagbawon sa kalipay ang tawo kun sa pulong lang ipakita nga kita nag-ampo.
Gihulagway sa maong lilas nga bisan asang tinuohan o pagbansay ug pagtuon niini – wala kini bias o kapihig kon wala masinati ang kalinaw sa kaugalingon.
Bisan imong pugson imong huna-huna sa kalipay nga gimithi – apan kon ang imong kasing-kasing ug kalag nagdumili – sama ra gihapon nga walay hinungdan ang tanan.
Alang sa uban, ang pagtabang sa isig-kaingon usa ka pamaagi nga ikaw mainampoon ug sa mata sa katilingban – ikaw usa ka tawong dalaygon. Apan dili kini igo tungod kay aduna pa may kulang nga imong gitinguha nga wala nimo makit-i o makab-ot.
Ang pag-ampo wala magkinahanglan sa balay alampoanan – kundili – sutaa ang kalinaw ug kasinatian nga ikaw malipayon ug dunay gikahadlokan nga imong gituohan nga maoy mogiya sa imong pagpakabuhi ug panginabuhi.
Ang pagpakaron-ingnon dili sukod nga ikaw nag-alagad sa Dios ug katawhan. Ipakita sa imong kaugalingon nga buhong ka sa kalipay ug natagbaw ka sa imong gipamuhat.
Love!
Mao kini ang gipangita ni Liz, diin sa iyang sayong kaminyoon, nahulog lang sa panagbulag. Iya kining gilimod nga nagpangita siya sa gugma nga tiunay tungod sa kahadlok nga mapakyas pag-usab.
Bisan tuod misulay siya’g relasyon apan tak-up ang iyang kasing-kasing ug panghuna-huna nga mutukib sa tinoud nga kahulogan niini. Busa, ang iyang gidamgong “balance” sa kaugalingon nga maoy maghatag kaniya og kalinaw ug katagbawan – wala pa gayod niya masinati.
Sa lilas, ang Guru, Wayan ug Ketut – pipila lang sa kasangkapan nga gipakita aron ang tawo magmata sa tiunay nga kahulogan sa kinabuhi dili sila maoy mohimo sa tanan aron makit-an nato ang atong gipangita – kundili igo lang sila mopahiluna ug mapahigmata sa atong nasalaag nga kaugalingon.
Busa kining maong lilas nga Eat Pray Love – gihimong instrumento aron ang katawhan makahinuklog sa ilang tagsa-tagsa ka kaugalingon. Ilabina karon nga halos kitang tanan nalimot na sa gitawag nato og “basics” tungod kay ang pagpadagan karon sa kinabuhi sama na sa teknolohiya – automated, computerized ug short cut, ang tanan nagdali…
Usahay nagkinahanglan nga mawad-an kita sa panimbang aron masinati ug mahinangup ang gimithing katuyoan sa atong nahisalaag nga kaugalingon.
life's musings 